Hierdie kommissie het ten doel om die verbondskinders te begelei in hulle geestelike vorming. Hier speel ons kategese onderrig ’n groot rol. Kinders word in die Woord en die leer van ons kerk onderrig en begelei na belydenisaflegging. Om dan na belydenisaflegging betrokke en dienende lidmate van ons gemeente te wees. Saam met die kategese word vir die kinders ook ander aktiwiteite aangebied wat meehelp in hulle geestelike vorming.
Kategese
Kategese vind plaas tydens skool kwartale direk na die kerkdiens om 10h00. Tydens nagmaalsgeleenthede is daar nie kategese nie. Die datums is ook beskikbaar in ons jaarkalender.
Januarie 2025
God ken ons ten volle
Skrifgedeelte: Psalm 139
Kernvers: Psalm 139:1 – Here, U kyk of ek eerlik is en vertrou kan word. U weet wat gaan hier binne-in my aan. (Die Boodskap)
Boodskap: God ken ons ten volle en weet alles van ons af. God is elke oomblik van die dag naby ons. Ons weet dalk nie alles van God nie, maar ons gaan die jaar saam leer deur veral saam te kyk na bekende stories uit die Bybel.
Vir die ouer/voog: Ons gaan die jaar saam leer van hoe God ‘n pad stap met gewone gebroke mense net soos ons. Ons gaan leer hoe God, ten spyte van ons tekortkominge, ‘n verskil in ons en deur ons in ander mense se lewens kan maak.
Ons is geroep – Die storie van Abram
Skrifgedeelte: Genesis 12
Kernvers: Genesis 12:1 – Op ‘n dag het die Here vir Abram gesê: “Jy moet weggaan, weg van die plak waar jy gebore is, weg van jou pa se huis af. Ek sal jou ‘n ander land gee waar jy kan gaan bly.” (Die Boodskap)
Boodskap: Abram word geroep om na ‘n onbekende land te gaan. Abraham neem alles en almal saam met hom na ‘n dorre en amper onbewoonbare land veral as mens na die fotos kyk! Dit is hier waar ons die eerste keer sien hoe Abraham sy vertroue in God sit.
Vir die ouer/voog: Die gedeelde sluit aan by die eerste geleentheid van die jaar. God ken ons volkome en weet wat ons nodig het. As God ons oproep tot aksie kan ons ook vertrou dat God sal voorsien, nie noodwendig wat ons sal wil hê nie, maar wat ons nodig het.
Februarie 2025
Vertroue – Die storie van Abraham en Isak
Skrifgedeelte: Genesis 22
Kernvers: Genesis:22:8 – Abraham het geantwoord: “Moenie bekommerd wees nie, seun. God sal self nog vir ons ‘n skaap gee om te offer.”
Boodskap: Die Boodskap vertaling van die Bybel beskryf die storie as “Abraham se groot toets”. Ons het baie besittings en mense in ons lewe wat vir ons baie beteken. Sou ons dit opgee as die Here daarvoor vra? Sou ons God kan vertrou dat hy sal voorsien? Abraham moes swaar gedra het aan wat gevra word van hom oor die dae wat hul gereis het na die plek waar hy Isak sou moes offer. Tog het hy die hoop en vertroue in God gehad dat God sal voorsien. Dit sien ons ook in sy woorde aan Isak – God sal voorsien.
Vir die ouer/voog: Die versoek om jou kind op te offer is ‘n verskriklike toets. As mens wel in vandag se tyd dit koppel aan ander belangrike dinge in ons lewe wat ons tyd en ons aandag neem, sou ons dit ook kon opoffer vir die Here in die vertroue dat God sal voorsien wat ons nodig het?
Jakob droom
Skrifgedeelte: Genesis 28:10-22
Kernvers: Genesis 28:15 – “Onthou een ding, Jakob: Ek is by jou. Ek gaan saam met jou waar jy ook al gaan”…
Boodskap: Vandag het ons ook in die kerk gesien hoe kinders gedoop is en ons het geleer wat die woord verbond beteken. God sluit van Sy kant af ‘n verbond met ons. Ons kan dit nie uit ons eie doen nie. In die Bybel lees ons die verhaal van Jakob wat droom en herinner word van God wat met hom sal wees waar hy ook al mag gaan.
Vir die ouer/voog: Dit is belangrik dat ons moet weet dat ons verhouding met God bloot genade is. Die verhouding is nie iets wat uit onsself kom nie. God se verbond staan ewig. Soos Jakob ‘n klip regop gesit het as teken van ‘n ontmoeting met God, kan ons, ons kinders verduidelik van hul doop en die nagmaal wat tekens is van God se verhouding met ons as mens.
God roep vir Moses
Skrifgedeelte: Eksodus 3
Kernvers: Eksodus 3:6 “Ek is die God van jou voorouers, die God van Abraham en van Isak en van Jakob”
Boodskap: Ons word vandag weer herinner deur die verhaal van Moses dat God sy beloftes hou. God bly dieselfde dieselfde God – God herinner Moses dat Hy die God van sy voorwaarders was – Abraham – Isak en Jakob. Moses word geroep vir ‘n groot taak om die volk van God uit Egipte te lei. Moses is onseker oor die groot opdrag wat vir hom gegee word en ons leer hoe God ten spyte van ons tekortkominge voorsien as ons met Sy werk besig is.
Vir die ouer/voog: Ons moet ook soms herinner word dat God altyd dieselfde bly. Net soos ons liefde en omgee vir ons kinders nooit vergaan nie, so bly God se verbond ook staan. As mense is ons soms onseker en het ons baie verskonings, net soos Moses, as ons geroep word to aksie. Ons kan op God vertrou dat wanneer ons met Sy werk besig is ons alles sal ontvang wat ons nodig het.
Maart 2025
Die Farao luister nie
Skrifgedeelte: Eksodus 5
Kernvers: “Wag,” sê die Here. “Ek sal my belofte hou. Maar, omdat die koning nie na My wil luister nie, lê daar ‘n paar harde lesse vir hom voor. My eie mense sal ook begin verstaan hoe groot en magtig Ek is.
Boodskap: Ons het almal heel moontlik gehoor van die 10 plae van Egipte. Dink net hoe verskriklik dit moes gewees het. Muggies orals, paddas, vee wat doodgaan, donkerte orals. Ons sien hier hoe die Farao nie wil luister na Moses se versoek om God se volk te laat gaan nie. Soos die kernvers dit stel – die farao het ‘n paar harde lesse geleer. Ons ervaar ook probleme as ons nie na die Here luister nie. Ons vergeet ook soms dat as ons nie luister nie dit ook sleg kan gaan met mense om ons. Kom ons luister na die Here en wees dankbaar dat Hy ‘n God is wat sy beloftes hou.
Vir die ouer/voog: Die boodskap van vandag hoor ons weer dat God Sy beloftes nakom. Ons sien hoe ongehoorsaamheid lei tot ongemak en selfs verlies tot die dood. Gesels gerus met u kind oor gehoorsaamheid en gevolge as ‘n mens jou teen God se wil verset. Ons word ook herinner aan God se belofte aan Abraham – God gee om vir ons, kom ons wees gehoorsaam en luister na God se wil.
April 2025
Jesus op die donkie – Jesus word gekruisig
Skrifgedeelte: Lukas 19; 23
Kernvers: Lukas 23:46: “Jesus het hard uitgeroep: “Vader, in u hande gee Ek my gees oor.”
Boodskap: Ons praat oor hoe Jesus eers ontvang is soos ‘n koning en toe gekruisig is. Deur die krusiging is daar vir ons hoop. Jesus het vir ons sonde betaal deur die kruisdood en daar is hoop in Jesus se opstanding in dat ons ook saam met kom kan lewe.
Vir die ouer/voog: Die kruisdood van Jesus en hoe onregverdig Jesus hanteer was is ‘n storie wat aan ons harte raak. Jesus het vir ons die prys betaal. As ouer is mens geseënd met ‘n tikkie insig wat dit beteken om vir jou kind in te tree, die moeilike vir hul te dra. Dit bring ook die kruisdood in nuwe perspektief hoe God sy Seun nie gespaar het vir ons sondes nie. Deur Jesus se opstanding is daar hoop wat ons kan vier gedurende paasfees.
Mei 2025
Jesus staan op uit die dood
Skrifgedeelte: Lukas 24; Matteus 28
Kernvers: Matteus 28:19: “Gaan dan na al die nasies toe en maak die mense my dissipels”
Boodskap: Jesus het uit die dood opgestaan en is opgeneem in die hemel. Jesus het vir ons ‘n belangrike opdrag gegee – om mense dissipels te maak. Ons kan elke dag by die skool en met die maat wat ons by die skool het God se storie deel. Ons praat oor oor hoe ons ‘n tempel van God is deur sy Heilige Gees wat gestuur is.
Vir die ouer/voog: Gesels saam met u kind hoe ons die liefde van Jesus kan deel met die mense om ons. Hoe kan ons leef dat ander kan sien daar is hoop in ons lewens.
Junie 2025
Geen silwer of goud
Skrifgedeelte: Handelinge 3
Kernvers: Handelinge 3:6: “Toe sê Petrus: Silwer en goud het ek nie; maar wat ek het, gee ek jou: in die Naam van Jesus Christus, die Nasaret, staan op en loop. En hy het hom aan die regterhand gegryp en hom opgetel, en dadelik het sy voete en enkelbene krag gekry.”
Boodskap: Ons lees van hoe Johannes en Petrus ‘n bedelaar teekom. Die bedelaar met verwagting hoop dat daar iets vir hom gegee sal word, maar Jonannes en Petrus het nie geld om te gee nie. Hul gee toe wat hul het, die hoop van Jesus Christus en daar gebeur ‘n wonder werk. Die man word opgehelp en hy kan loop. Deur God se Gees het ons as kinders van God baie om vir die wêreld te gee. Ons kan hoop bring, vreuge gee en liefde uitdra – die is soms baie meer werd as geldelike bydraes.
Vir die ouer/voog: Die boodskap sluit aan by die lesse wat ons gedurende April en Mei hanteer het oor die Heilige Gees wat ons toerus met krag net soos Jesus beloof het (Lukas 24:49). Deur God se genade kan ons ook deur liefde ‘n verskil in mense se lewens maak. ‘n Bydra tot die wêreld gaan nie net oor geld nie. Ons kan ‘n verskil maak deur God se liefde met die wêreld te deel en uit te leef.